Pjesa e parë,
ku parshtrohen bazat e teorisë se shqipja është mëma e të gjithë gjuhëve dhe
shpjegohet rëndësia e K-së. Ligjërata e Albanolout në
Mbledhjen e Grupit të Punës për Përcaktimin e Metodës së Zhdukjes së qenve
(GPPMZH).
Është fakt
i pamohueshëm, ndonëse jo plotësisht i pranuar dhe i pavërtetuar shkencërisht
nga një shumicë bindëse shkencëtarësh, se origjina e njeriut e ka prejardhjen
te një fis i vetëm i racës njerëzore. Ky fakt, të cilin do ta marrim si të
mirëqënë, nxjerr në mënyrë rrjedhimore edhe faktin tjetër, që te ky fis, te kjo
racë primordiale, parësore, ka ekzistuar edhe një gjuhë e
parë, primordiale ose parësore. Prej tyre, prej racës
dhe gjuhës së parë, kanë dalë, në mënyrë degëzuese dhe zhvilluese racat dhe gjuhët
e shumta të botës.
Por cila është gjuha që mbart në vetvete rrënjën e të gjitha
gjuhëve? Cila është gjuha që shërben si pikë takimi për të gjitha gjuhët e
tjera të botës? Cila është gjuha e gjuhëve, kyçi i artë i zbërthimit të
gjithçkaje që flitet? Është pikërisht SHQIPJA, zonja e zotërinj, gjuha më e
lashtë dhe më e vjetër e botës, gjuha e fosilizuar dhe e ruajtur prej shekujsh
me fanatizëm në mënyrë të përsosur nga një popull me tradita.
Le të mos humbasim kohë dhe të hidhemi drejtpërdrejt në një
pasqyrë të shkurtër përmbledhëse për të shpjeguar thelbin e teorisë sime, të
cilës i kam kushtuar një punë hulumtuese 35 vjeçare.
Së pari, a mund të më jepni një shpjegim se përse në gjuën
shqipe, dhe pikërisht në gjuhën shqipe, të gjitha pjesët kryesore të trupit të
njeriut fillojnë me gërmën K? Le t’i
përmendim disa prej tyre : - Koka; Kreu;
Kicat (përdoret për dhëmbët e fëmijës); Krahërori; Krahët; Kurrizi; Kurmi; Kërthiza;
Këllqet; (më falni); (më falni) Koqet; Kofshët; Kërcinjtë; Këmbët.
Çfarë është K-ja
dhe çfarë përfaqëson ajo? Çfarë fshihet pas kësaj gërme të mistershme dhe përse
pikërisht ajo paraqitje grafike në alfabetin latin?
Çdo arsyetim i thjeshtë shkencor të shpije në mendimin se K nuk është gjë tjetër veçse vetë qenia
njerëzore, vetë njeriu. Këtë përfundim do ta arrinte çdo gjuhëtar, sado amator
që të ishte. Po ta mbani pak frymën, ta pranoni një gjë të tillë dhe të shikoni
pak më tej, do të vini re të habitur se vërtet, edhe paraqitja grafike e gërmës
K në alfabetin latin, i përngjan së tepërmi një njeriu që qëndron në këmbë, i
parë në profil, me njërin krah të dhe njërën këmbë të nxjerrë anash. Diçka e
ngjashme me figurat e egjiptianëve të lashtë. Referojuni, ju lutem, figurës
numër 1 në dosjet tuaja.
Nëse K i referohet
njeriut, atëherë pa dyshim kemi shpjegimin e fjalës këmba, e cila s’është gjë tjetër veçse: këmba = K + mba, që do të thotë diçka që mban K-në, njeriun.
Ndërsa, nga ana tjetër, fjala Koka mund të zbërthehet në K + O + ka, që s’do të thotë tjetër veçe
K-ja (në rastin konkret njeriu) ka një O, që përfaqëson formën e rumbullakët të kokës së njeriut.
*) Shkëputur
nga libri Canis Familiaris ose Kronikë
Bastardësh, Tiranë 1994 (Vijon)
No comments:
Post a Comment